Yau ma Maman Khalil ba ta yi min sallama ba ta wuce wurin aiki.
Na rika hasashen tana jin irin zafin da nake ji ne, ko kuma dai ta yi latti, zan jira ta dawo domin tantance zargina.
Mu ka sha baccinmu da Ramla, sai 12pm na shiga kitchen, jalouf din taliya na yi mana da ta ji busasshen kifi da ganyen ogu, Ramla na fara sanya ma wa, kafin na watsa ruwa hade da yin alwalar sallar azhur.
Bayan na idar doguwar riga mara nauyi armless na sanya, kafin na zuba abinci ni ma. Cike da jin dadi nake cin abincin.
Misalin biyu da yan mintuna motar Sakeena ta shigo.
Kamar 30mns da dawowarta na mike zuwa part din nata, hannuna cikin na Ramla.
Affan ne ya bude mana kofa, lokaci daya kuma ya mamutsi Ramla, sosai yaran ke son Ramla, tana da farin jinin mutane.
A wajen na bar su zuwa cikin falon nata, zaune take tana shan rake
“Ƙurmusu!” na yi maganar cikin salon tsokana
Dariya ta yi kafin ta ce “Ga naki can cikin fridge, na gaji ne yau sosai”
Fridge din na zarce hade da dakko nawa raken na dawo falon.
Hira muke yi sosai, a cikin hirar ne take fada min Rahma za ta shigo gobe. Na ce Allah Ya kai mu.
A nan na yi sallahr la’asar kafin na koma part dina, saboda na san mijinta yana kan hanyar dawowa.
Ban jima da baro wurintan ba kuwa ya dawo.
Kashegari da ta kama Friday, ana sakko masallacin juma’a Rahma ta iso, na so ganinta a lokacin da take shigowa, Sai dai lokacin ina sallah.
Ina idar da sallahr kuma na yi wa Ramla wanka, na shiryata cikin riga da wando yankanti wandon jeans blue black, da white shirt mai kyau. Ni ma cikin doguwar rigar material rubber na shirya, sosai rigar ta boye girman cikina, duk dama jiki ya sanya ni sosai.
Muka fito hannuna cikin nata, cikin sa a main kofar a bude, shi ya sa na saka kai, kaina tsaye
Maganar da na ji su na yi ne ta tsayar da ni, hade da rufe bakin Ramla da hannuna don ma kar ta yi magana su ji mu.
“Hmmm! Kishiya ko ta kara ce aka yi miki ita wallahi kawata sai kin ga canji, ina hakuri ne kawai game da danne kishina saboda kada girmana ya fadi, amma tabbas ina ganin abubuwa.”
Mamaki ya kamani da jin kalamanta, “To me take gani?” na tambayi kaina hade da kame habata cike da mamaki.
Lokaci daya kuma na mayar da hankalina kansu
“Kin ga rawar kan Baban Khalil kuwa? To kamar bai taba hada shimfida da wata mace ba sai ita, koda rana ya shiga bangarenta to bai fita haka nan, ni kuwa nan wani lokacin sai idan ni ce na kusanceni shi”
Zaro idon mamaki na yi, “ya a kai ta san Abban Khalil ko da rana baya kyale ni ? Na kuma yi wa kaina tambayar ina kuma mamakin maganarta wai sai idan ita ce neme shi. Ni kuma a can nawa bangaren ina ganin kullum a manne suke da juna, wannan shi ne zargin-zargin.
Wato ita kishiya duk inda kika motsa idonta a kanki yake. To idan ba haka ba, ya aka yi ta san wani abu na faruwa tsakanina da Abbansu Khalil da rana, ko don kawai ta kama mu sau daya.
” Ko a dakina yake kaf hankalinsa a kanta yake, wani lokaci ko magana muke sai ya kira ni da sunanta”
“Ba ke kadai ba Madam, ni ma yana yi min irin wannan suɓutal kalam din, ashe ke ma kina jin haushi.” na yi maganar a zuciyata tare da gyarawa Ramla tsayuwa don kar ta gaji ta tona min asiri.
“Shi ne ba za ki dakatar da hakan ba?” cewar Rahma cikin zafi
“Kawata ba ki san zaman kishi da wayau ake yin sa ba? Ai shi yaƙi ɗan zamba ne. Kuma a haka ma yana kokarin ganin ya daidaita kanmu kawai dai kin san sabon aure murnar ba ta boyuwa.”
Ta ɗan dakata kafin ta ci gaba
“Shi ya sa ni kuma na nuna ban damu ba, ita ma na kame mutumcina da girmana a gurinta, in ji, in yi kamar ban ji ba, in gani in yi kamar ban gani ba, ko ba komai ban bayar da kofar raini ba, na ja girmana.”
“yarinyar ba ta miki rawar kansu irin na zamani?” tambayar Rahma cikin wata kasalalliyar murya
“To ga abu nan dai, abin da na fahimta dai tana da tsananin kishi, haka nan ma sai ta yi ta fushi musamman idan a dakinta yake ya shigo bangarena, ke kwanakin baya ma mun kai sati biyu ko magana ba ma yi, ni ma kuwa na shareta, da kanta ta sakko, da ina biye mata da abubuwa marasa dadi sun faru, don kuwa kishina ma ya fi nata, ina jan girmana ne kawai tare da danne shi “
“Ikon Allah ki samu mace da mijinta, kuma har ki nuna wai kin fi ta kishin sa ” Akwai alamun mamaki a maganar Rahma
“Kuma wayau gareta fa, yanzu ta canja tako, ta janye yarannan gurinta musamman Ramla, to yanzu dai hankalinsa ya kuma komawa wajenta kullum cikin yabonta yake, idan yana yi taya shi nake ba na son ko kadan ya fahimci ina kishi sosai, amma a kasan zuciyata kamar wuta, wai a gabana Baban Khalil ke yabon wata ba ni ba, hmmmm! Wani lokaci sai in yi kuka mai yawa in share hawayena, ko ba komai da karuwar waje gara ta gida.”
“Ki yi hakuri tun da ma ba ta yi kokarin raba ki da mijin ba, sannan ba ta yi miki rashin kunya, sai a lallaba a tafi haka, ki ci gaba da rike girmanki, yara kuma tun da ba hanyar banza take sanyasu ba rika yi mata kara, ki kuma mika mata su ita ma idan nata sun iso ki kama ki rike hannu biyu.” Cewar Rahma cikin sigar lallashi
Jin shiru Maman Khalil ba ta yi magana ba sai Rahma ta kuma dorawa.
” Kishi kawai yan dabaru ne, kuma kishin cacar baki yanzu an daina shi, kishin neman kudi da yadda za ka zauna da mijin da kuma yan’uwansa ake yi. Kuma wajen wannan kawata bana jin ki, tuni kika kama danginsa kika rike, kina da tsafta, kin iya kwalliya, kin iya girki, kina da jiki mai kyau, kina kula da yaranki, mijinki kina kokari a kan duk abin da ya shafe shi sai dai ko butulci zai yi miki, uwa uba kina da hanyar samun kudi, to me ya rage kawata? “
” Hmmmm! “
Kawai na ji Sakeena ta iya fada.
” Yanzu dai ki kiyaye duk wani abu da zai janyo ki fada ta fada, wannan shi ke zubar da mutunci yarinya ta rika ganin ita din sa’arki ce, kar ki sake ki kai kararta wajen mijinki, duk lokacin da za ki yi maganarta ya zama alkairinta za ki fada. Wannan zai sanya ki kara girma a idonsa.”
Har yanzu Sakeena ba ta ce komai ba da alama sauraron nasihar kawar tata take yi.
” Please calm down kawata haba mana.”
A wannan karon ziro kaina na yi cikin dabara hade da leka falon, Rahma ce ta sakko daga kan kujerar da take zaune tare da dafa kafadun Maman Khalil cikin sigar lallashi.
A yayin da Maman Khalil din ke tsiyayar da hawaye hade da ajiyar zuciya.
” Kawata ban samu na zubar da hawayen nan inda za a lalllashe ni ba, bar ni in zubar dasu a gabanki, ke ce za ki lallasheni, ba kuma za ki goranta min ba watarana ba, kirjina yana zafi, wani lokaci ina jin kamar zan mutu idan na ga Baban Khalil na ta rawar jiki zai shiga dakin Khadija. Ko ganinta ne bai yi ba, to ya yi ta tambaya kenan, ko kuma ki ga hankalinsa duk ba ya tare da shi. Ranar ma ce mun ya yi wai zai ba ta motarsa shi kuma ya sayi wata. Ki ji fa ni ciko ne ma zai yi min amma da kyar na samu, shi ma ba duka ba, amma wai zai ba ta motarsa.”
Ta karashe zancen hade da gyara zama kafin ta dora
” Banza na yi mishi a lokacin, sai kuma ya fara kame-kame wai ta yi mata girma, zai dai duba kila ya siyar ya siya mata karama. Ni dai ban ce masa kala ba. Tun zama na da shi bai taba jaraba sai mun mota ba, sai a kan wata da ko shekara ma bai yi da ita ba.”
Ta karasa maganar cikin kukan da ya ci karfin ta hade da narkar da zuciyar mai sauraro.
Ni ma sai na kuma matse bakin Ramla tare da dagata cak mu ka yi waje jikina a mace, saboda da kyar nake jan kafata, Jiki a mace na zauna kan kujera hade da sauke ajiyar zuciya mai nauyi.
Shiru na yi na rasa ta ina zan fara tunani, wato ni ina zargin ya fi sonta, ita tana zargin ya fi sona, duk inda kishiyoyi suka hadu to dayan-biyun, kodai wannan ta ji ba ya sonta ya fi son wannan, ko kuma ko waccan ta ji an fi sonta.
Ban taba tunanin Maman Khalil tana da damuwa irin haka a kaina ba, wato da hakuri ta fi ni, da kuma iya tako. Ita shirunta shi ne maganarta. Kuma da alama yana gane yaren nata, saboda ko a mafarki bai taba min zancen mota ba, kuma na kara gasgata shirunta shi ne hukuncinta, idan har zai ga ta cika shirun to ya yi ta sintiri kenan zuwa dakinta.
Kai namiji sawun keke ba a gane gabanshi.
Ni kuma ba na iya shiru ko boye fushina, kuma ya zama dole in koyi wancan dabi’ar tata, ta danne abu ta yadda ba kowa ne zai fahimci kana da matsala ba
Ni ma dole in koyi yin shiru da bakina idan ya yi abun da nake ganin rashin adalci ne, saboda dama yawan yin maganar tawa yana rage kimata a idonsa.
Kuma da gaske Rahma take yi, yawan kai korafi ko yawan kawo kara yana sa ka sirewa mutum, tun yana kamawa watarana sai ya daina kamawa.
Ko ni ya faru da ni, kai tsaye Baban Khalil ya ce ya yi danasanin aurena, wai kullum matarsa tana yabon halina ba ta taba kawo karata ba, amma ni kullum cikin kawo kararta nake, ashe duk salon kissa ne ke hanata yin maganata ko kai karar tawa. Ni ma na karu da wannan.
Muskutawa na yi har yanzu jikina a mace yake, cikin tsananin tunani mai zurfi
Yanzu dai na fahimci inda nake da rauni, zan kuma gyara.
Sannan ni ma dangin mijin ne kawai suka rage min in kama, tun da dai Maman Khalil da kanta ta yadda mijina yana sona, to na daina tayar da hankalina a kan wannan, dama damuwata ko a banzace take kallona, duk da haka zan kara nemo hanyoyin da zan kara rike abuna, ni ma sha Allah sai na zama kamar ita, har ma fiye.
A kasalance na nufi kofar saboda kwankwasawar da ake yi.
Rahma ce tsaye tare da Maman Khalil
Sabanin Maman Khalil, ita fara ce tas, Sai dai ita ma yar gayu ce kamar Maman Khalil, wani kamshi mai dadi na fita daga jikinta
“Na zo ganin yarki ne. Tun da kin ki kawo ta” Rahma ta fada cikin dariyar tsokana
Ni ma murmushi na kakalo, ina ja gefe, “shiga, ga ta nan, ki ganta, ki bar ta a nan, idan gani ne kawai ba ma fada.”
Dukkanmu mu ka yi dariya a lokacin da muke zama ni da Maman Khalil, Rahma kuwa Ramla ta nufa da ke ta wasanta a wurin dining
“Ma sha Allah! Kawata Ramla ta fi kyau a zahiri, ban da Amarya ta riga ni tabbas da na karbe Ramla na jefata a cikin yan mazan gidana, amma duk da haka ina yi wa Farhan dina riko gaskiya.”
Ta fada a daidai lokacin da take zama hannunta rike da na Ramla.
Mu kam dariya kawai muke yi.
” Kunshin nan ya yi kyau fa, nawa za mu biya gara mu fara toshi.”
“Ga me yi mata nan, ni tun da na haifeta ban taba mata kunshi ba, to ban iya ba, ita kuma kullum cikin yi suke, da ya fita su kuma mayarwa.” cewar Maman Khalil tana kallon Rahma
Ni kam murmushi kawai nake yi.
“Ma sha Allah! Ai kunshi yana da kyau sosai a wajen mace, to ni ma fa nan bana yi, sai in yi shekara biyar ban yi ba.”
Duk muka dan yi siririyar dariya.
Ta kai hannunta hade da shafa kitson kan Ramla, Chuku ne na zanen hausa, ya kamu sosai kan kamar an sudeshi.
” Har kitson ma ke ce ke yi?”
Jijjiga kai na yi ina murmushi
Rike da haba cikin mamaki ta ce” Ke komai kin iya wai?”
Wannan karon dariya na yi sosai kafin in ce” Ba fa komai ba. “
” To me ye ba ki iya ba? Cewar Maman Khalil tana kallona, kafin in yi magana kuma sai ta dora
“Kin iya komai, kamar ba a zamanin kiwa kika zo ba, yaran yanzu bayan rashin kunya babu abun da suka iya, sai kadan ne irinku”
Wannan karon ma murmushi kawai na yi
Ji nake kamar bugun cikina suke yi, ko kuma dai kishinta ne yau ya ci karfinta.
Karar motar Baban Khalil ce ta sanyasu saurin ta shi gabadayansu, Maman Khalil na fadin “Mijinki ya dawo, ga tsarabarku nan ke da yarki, daga Maman Farhan”
Ni ma mikewar na yi, hade da karbar ledar na dan leka ciki, tare da yi mata godiyar da na san tabbas ta gamsu na yaba da kyautarta.
Gefe ya rabe suka fita, saboda bude kofarsa ya yi daidai da niyyar bude kofarsu su ma.
Daga ganin gaisuwar da suke da Rahma ka san an dade tare, akwai kyakkyawar alaka, don kuwa Maman Khalil nan ta barsu tsaye a barandata, ni ma sai na karbi jakar hannunsa, na shige ciki, yayin da na bar su a nan hannunsa rike da Ramla.
Ina raka’ar karshe a magriba ya shigo cikin sauri ya yi alwala zuwa masallaci, saboda har an idar da sallahr bai yi ba suna magana da Rahma.
Bayan na idar da sallahr isha’i na jera mishi abinci a kasa, kamar yadda ya fi so.
Wanka na shiga, bayan na fito na watsawa Ramla ita ma hade da sanya mata rising powder.
Pant kawai na sanya mata, yayin da ni kuma na sanya doguwar riga mai yankakken hannu, ba ta da nauyi ta dace da yanayina da kuma yanayin garin, humrah kawai na shafa a jikina.
Falo na fito na yi zaman da na fi so, wato in hada bayana da kujera hade da ware kafafuwana, iskar fanka na ratsa ni, a yanzu na fi kaunar irin wannan zaman fiye da ko wane kalar zama.
