Daurewa kawai na yi kafin na ce mar “Ka yi hakuri don Allah, mu je in kai ka toilet din.”
Da kyar na samu ya yarda na taimaka masa, sai da na tabbatar na yi mishi duk abin da ya dace sannan na koma kitchen, a lokacin kuwa miyata ta fara konewa.
Bayan na motsa miyar hade da rage gas, cigaba da zagaye kitchen din na yi da goyon Maama so nake ta yi bacci.
Yayin da a zuciyata nake jin wani irin zafi, ku san kullum Baban Khalil sai ya nuna gazawata a kan abu, kamar haushina yake ji, abu kadan sai fada, ya dauki alhakin mutuwar matarsa ya dora a kaina. Kamar ni ce na kashe ta. Bai san ni ma ina jin babu dadi a kan mutuwar tata ba
Komai na yi, bana burgesa, sai ya ga abun kushewa.
Ban da ina jin tsoron bakin mutane da na yi tafiyata na ba shi guri. Kar ya kai ni makura in fara tankawa.
Misalin karfe biyu na rana su Rahma suka iso, wannan ya tabbatar min da tun asuba suka dakko hanya.
Sosai na ji dadin zuwansu, bayan gaishe-gaishe, suka yi sallah, ni kuma na kai wa su Bashir abinci shi da mijin Rahma. Su Khalil kam tuni suna gidan kakanninsu.
Rahma zaune tana cin abinci ta ce “Aunty Ramla haka ƙafar Abbansu ta kara yi?”
Cikin jimami na ce “Wlh fa, an ce wai daji ne, ana ta magani, amma babu karayar yanzu”
“Yanzu wannan ciwon ana magani kenan? kalli fa yadda kafar ta zama”
Kai na jinjina alamar eh, saboda ni kaina ba na ganin wani ci gaba, kawai dai ana magani ne, amma kullum kafar kara caɓewa take yi, duk da wani farfashe. Ga shi ta kumbura sumtum, nan kashi nan fitsari.
“Ya kamata a fitar da Abbansu waje Auntyn Ramla, wannan ciwon akwai daga hankali. Managarcin mutum ingarma kamar Abbansu, amma kalli yadda ya koma, komai sai yana zaune za a yi mishi. Gaskiya hankalina ya tashi. Idan kawata na da rai ba za ta amince ce ba. “
Komai ban ce ba, Sai hawaye da nake sharcewa. Ban san me ya sa mutane suke cewa idan Sakeena na da rai ba za ta yarda ba. To idan ba ta yarda ya za ta yi, ko za ta cire mishi ciwon ne? Ni ban san me zan yi ba kuma?
” Kalli ke ma duk kin rame kin yi baƙi?” cewar Rahma
A zuciyata na ce “Ba dole ba,” ( wai arne ya tambayi pastor Idan ya mutu zai shiga aljanna? Pastor Ya ce ba dole ba, mutum da gidan uban shi) ai dole in yi rama, abubuwa da yawa ne a kirjina. Jimamin mutuwar Sakeena da Ramla, ga ciwon Bashir, ga jinya, ga tsotso, ga rigimar Maama. Ga ta Bashir da kullum nake zama mai laifi.
Haka muka rika hira da Rahma wata ta kwantar min da hankali, wata kuma ta tayar min da shi.
Da yamma na raka Rahma gidansu Sakeena, daga can muka wuce gidansu Bashir. A can na samu su Affan lan ci wasa da rashin ji an gaji. Sai magriba muka baro gidan. Inda duk zamanmu tattaunawar dai a kan ciwon Bashir ne.
Da safe ma haka aka dora, mijin Rahma ya dage lallai a fita da Bashir zuwa kasar waje
Wannan karon kam basu ki ba, amma sun ce wai a jira nan da sati biyu, akwai sabon mai maganin da aka samu, idan abun bai yi ba, Sai a fita wajen.
Haka su Rahma suka koma duk jiki a mace
*****
Bayan tafiyarsu Rahma kam ciwo sai dai godiyar Allah. Amma naman ƙafar Bashir zafkewa yake da kanshi yana faduwa. Fadin tashin hankali da muke ciki ba sai an fada ba. A haka aka kwashe shi zuwa babban asibitin Katsina.
Kwanansu daya mu ka bi bayansu.
Tun bayan da na isa asibitin mu ka gaisa komai ba kara cewa ba. Damuwa ta ishe ni, a shekaruna 23 abubuwa sun haye min. Na rasa da wanne zan ji. Yanzu kam da nake kallon Bashir kwance cikin jinya, ji nake kamar in ce ya ba ni in karbar mai ya dan huta.
Ga Maama ta ishe ni da fitina sai mu fita waje, haka na mike zuwa wajen, ina rarrashinta, bayan ta yi bacci ne na kuma dawowa ɗakin. Zuwa lokacin ne kuma su Aunty Habi suka rika fita yin alwalar la’asar. Ni kam dama ba sallahr nake yi ba.
Shi ya sa na koma kan tabarma na zauna, hade da yin shiru, jin muryar Bashir yana kiran sunana ne ya sanya ni saurin dagowa. Saboda na dauka bacci yake yi.
Da sauri na isa wurinshi ina fadin “Kana son wani abu ne? Sannu Allah Ya ba ka lafiya”
Maimakon ya amsa min, Sai ya zuba min ido yana kallo na, ganin ba zan iya jure kallon ba ne ya sanya ni janye idanuna.
Hannuna ya guda daya ya saka cikin na shi, a hankali ya ce “Allah Ya yi miki albarka Khadija, na gode da dawainiyarki a kaina”
Komai ban ce ba, hakan ya sa ya dora da “Ki daina tayar da hankalinki, kalli yadda kika koma Khadija”
Hawayen da nake ta kokarin dannewa suka gangaro min, cikin muryar kuka na ce “Hankalina ba zai kwanta ba Bashir muddin kana cikin wannan halin, idan na ce ma zai kwanta karya nake yi. Babban burina in ga ka samu lafiya koda kuwa haka yana nufin za a cire kafar nan. A hakan ma ina sonka”
Ajiyar zuciya ya sauke kafin ya ce “Kirjina yana zafi Khadija, ji nake ina ma ace ni ma na bi Sakeena, ga shi yanzu ina rayuwa cikin ba tare da ita ba. Na rasa wanne abu ya fi min zafi tsakanin jinyar nan da rashin Sakeena. Wani lokaci in ji kamar wasa, wani lokaci kuma in gasgata ba ta a duniya. Da ace ni ma na rasu da duk ba ki shiga wannan tashin hankalin ba. “
Hannunshi da ke cikin nawa na matsa a hankali kafin na ce” Ina bukatarka a raye, ba ni kadai ba, muna da yawa ka daina fadin haka. Mu yi addu’ar ka warke “
” Yaushe? Khadija yaushe zan warke kullum ciwon gaba yake kara yi”
“Bawa ba ya fitar da rai daga rahamar Allah Bashir, Sha Allah za ka warke, za ka samu lafiya”
Duk mu ka yi shiru, shi ne ya katse shirun namu da fadin “Na ce su yanke kafar nan, amma sun ce a’a, wai kashin bai mutu ba”
Sabbin hawayen da ke zubo min na dauke, kafin na ce “Allah Ya zaɓa abin da ya fi alkairi. Bamu da wata dabara”
“Miko min Sakeena” ya yi jin Maama na kananan kuka
Bayan na sauke ta kan cinyarshi ya dorata yana kallon ta. Ita ma shi din take kallo. Murmushi ya yi kadan kafin ya ce “Kin faye rigima Sakeena, takwararki ba haka take ba”
Kallon shi kawai take yi, kallon shi ya mayar kaina kafin ya ce “Khadija kodai akwai abin da ke damun yarinyar nan ne ba mu sani ba. Ko a, gargajiyance haka? Rigimarta ta yi yawa.”
“To ni dai ban sani ba. Amma Maama kam ai tun aka haife ta haka take”
Kai ya jinjina hade da fadin “An ce yara idan suna ganin mutuwar waninsu. Kodai ta fahimci mutuwa zan yi ne?”
“Haba Abban Khalil! Me ya sa kullum kake son kashe min jiki, maimakon karfafa min gwiwa?ka san me mutuwarka kake nufi a wajena? To ni kaina ban sani ba. Amma na san shi ne karshen tashin hankalina”
Kafin ya ba ni amsa aka turo kofar, su Abdallah suka shigo, wannan ya sa ya mayar da hankalinshi kansu.
Duk yadda su Aunty Habi suka so in koma gida tare da su ki na yi. Ji nake ina juya baya abu mara dadi zai faru da Bashir. Hankalina ma ba zai taba kwanciya ina gida shi yana asibiti ba.
Ba don sun so ba, suka bar ni, amma sai aka ce zan zauna gidan wata matar abokinshi Mustapha, gidanta yana kusa da asibitin ne. Ni dai ba haka na so ba, na so ace a nan nake kwana kuma nake tashi.
Amma hakan ma ya yi min, ko ba komai dai zan rika kallon shi kullum.
Yanzu zaune nake a kan kujerar da ke fuskantarshi, Maama na shan nono, lokaci daya kuma ina yi mishi fifita a kafar, duk da lokacin karfe shidda da rabi na yamma.
“Su Affan sun kusa yin hutu Khadija, ina jin ya kamata su dawo gida, a nema musu makaranta, mun bar wa su Rahma dawainiya”
Kai na jinjina a hankali cike da rashin jin dadi, saboda school din su Khalil tana da kyau sosai, ba na jin za a samu kamarta ko a Katsina ba ma a Ruma ba.
“Gaskiya ne, amma kam ba na son a cire su a makarantar can, ka ga a Ruma babu makaranta mai kyan wacce suke yi”
“To ya za a yi, su ma wannan din kaddararsu ce, zan yi waya da Dr Nura, ya karbo min transfer latter yaran da school clearance na makarantar”
Ban kai ga ba shi amsa ba, wata mata doguwa, mai matsakaicin jiki ta shigo, sanye take da abaya blue, ta rolling ɗankwalin abayar. Kallo daya za ka yi mata ka fahimci akwai wayewa ta ilmi a tare da ita.
Cikin fara’a suka gaisa da Bashir ta yi mishi ya jiki, shi kuma ya amsata hade da yi mata godiya a kan dawainiyar da suke yi da shi. Kaina ta juyo cikin sakin fuska ta ce “Madam barka da yamma ya mai jiki?”
Murmusawa na yi kadan kafin na ce “Jiki Alhamdulillah, mun gode da dawainiya Allah Ya saka da alkairi”
“Babu komai. Ita ce za mu je tare” ta yi maganar hankalinta a kanshi
“Eh. Ta ki yarda ta bi su”
Yanzu kam ni ta kalla hade da murmushin da ya bayyana fararen hakoranta tana fadin “Tana da gaskiya ai. Ko ta koma hankalinta ba zai kwanta ba, gara tana kusa da kai. Allah dai ya kara afuwa”
“Amin” muka hada baki a tare, kafin ya ce, “Ta shi ku je”
Ba musu na mike hade da saɓa Maama a kafaɗata na ce “Sai da safe, Allah Ya ba ka lafiya”
“Amin, na gode”
Na juya kan matar da take amsa waya, a haka ta yi wa Abbansu Khalil sallama muka fita tare.
Wata farar mota mai kyau na ga ta tunkara, har zuwa lokacin kuma waya take yi.
Da kanta ta bude min front seat na zauna, ita kuma ta zagaya driver seat ta zauna daidai tana gama amsa kiran.
“Baby ya sunanki?” ta yi tambayar hade da yi wa Maama wasa
“Sakeena, amma muna kiranta Maama”
“Ma Sha Allah! Bari mu je ta hadu da wata Maaman mai rikici”
“Ita ma wannan ai tana taɓawa” na yi maganar cikin murmushi. Daidai lokacin ne kuma take fita daga asibitin
“To ko duk haka Maama suke?”
“Ba mamaki” na amsata, lokaci daya kuma mu ka yi dariya.
Haka ta rika ja na da hira har zuwa lokacin da ta yi horn a kofar wani kyakkyawan gida, ba jimawa, wani yaro ya bude kofar gate. Muka silala. Dandanan yaran suka zagaye motar, suna mana sannu da zuwa cike da nutsuwa. Sosai na ji sun burge ni, na ji Ina ma ace ni ce, zagaye da yarana cikin kwanciyar hankali. Ko yaushe zan ga wannan ranar ni ma oho.
Da wannan tunanin mu ka shiga cool parlor nata, komai unique cikin tsari, babu wasu tarkace, take na ji wata nutsuwa na shiga ta.
Wani daki ta nuna min, ta ce in shiga in huta.
Dakin madaidaici ne, akwai katuwar katifa, net, ac. Wardrobe Mai biyu, Sai karamin TV. Toilet din ma madaidaici ne, amma sosai yake a tsabtace.
Maama na kwantar hade da dauro alwala, ina sallah yara suka kawo min abinci.
Kamshinshi da miyar ke yi, ya sanya ni cin tuwon duk da rashin son cin abincina.
Ina cin abincin ne ta kuma lekowa tana fadin “Zan ɗan kaiwa Abban Khalil abinci asibiti, mai kai mishi abincin ba ya kusa”
“Ba damuwa” na amsa ta.
Sai da na yi sallahr isha’i sannan na yi wanka, na canjawa Maama kaya zuwa marasa nauyi.
Duk surutan da ke tashi a falo ban leka ba. Haka na yi zamana a cikin dakina. Muna chat da Bashir
A chat din ne yake fada min matar da na zo gidanta sunanta Fatima, amma Maman Hana ake kiranta, matar Mustapha Sandamu ce. Na san Mustapha Sandamun, Sai dai iya wannan kawai na sani, ban san wani abu da ya shafe shi ba bayan wannan.
Sosai muka sha hira da dare da Bashir, hirar da ta sanya ni yin bacci mai dadi. Dakyar na tashi na yi sallahr asuba ina kan sallayata, na rika jin ɓuruntun matar gidan a kitchen, wata zuciyar na fada min in je wurinta, wata kuma na hanani.
Daga karshe dai na mike zuwa waje, sound din na rika bi har na gano inda take. Gani na ya sanya fadada fuskarta da murmushi ta ce “Amarya har kin tashi”
Kai na jinjina a hankali kafin na ce “Ina kwana?”
“Lafiya kalau, ya bakunta ya kuma Maama, sarkin rikici?”
Wani murmushin na yi kafin na ce “Tana bacci ba ta tashi ba. Akwai abin da zan taya ki”
“Babu komai wlh, ki koma ki huta”
Nan fa muka shiga jayayya, ta dage lallai sai in tafi in huta, ni ma na dage lallai sai na taya ta. Haka ta hak’ura ta bar min soya doya. Ina muna hira, abin da na fahimta tana da faran-faran sosai. A shekaru kuma za ta yi tsarar Maman Khalil.
Misalin bakwai muka kammala komai har da gyara kitchen din, zuwa lokacin kuma tuna yaranta suna ta shirin tafiya makaranta. Kominsu cikin tsari gwanin sha’awa, saboda ita ma ce min ta yi za ta je ta yi shirin tafiya aiki.
A falon na zauna ina kallon yaran su bakwai, dukkansu kama suke da juna, duk da na fahimci akwai tagwaye a cikinsu.
Ina zaune a wurin na ji kukan Maama, wannan ya sanya ni mikewa zuwa dakin, Sai da na, gyara mata jiki sannan muka fito, a lokacin kuma yaran break fast suke yi, wacce ake kira da Ihsan ce ta mike hade da nufo mu tana fadin “See Beautiful baby Ya Zeeyad” wanda aka kira da Ziyad din ya waigo yana kallon Ihsan da ke ta kokarin daukar Maama amma ta ƙi yarda
Kamar za ta yi kuka ta ce “Tana ƙin mutane ne?”
Kai na jinjina mata alamar eh ina murmushi
“Oh my God! I like her”
Kan dinning din muka karasa, da kanta ta haɗawa Maama tea ta shiga ba ta, wannan kam tana amsa, amma a kan jikina. Sai da ta koshi sannan ta kyale ta.
Daidai nan Mamansu ta fito cikin shirinta, doguwar rigar atamfa irin dinkin Hajiyoyin nan ya sha stone, dauri mai kyau, fuskarta farar powder ce kawai da lipstick, Sai kamshi Mai dadi. Kafardarta sagale da blue mayafi wanda ya dace da atamfar
“Kina nan dama?” ta yi saurin tambayata
“Eh” na amsa hade da murmushi
Hannu ta mikawa Maama tana fadin “Beauty zo mana”
Yadda ta makale hannun ne ya sanya dukkanmu yin dariya, ita kuma ta dora da “Daga yau ga Beauty nan, daga yau Beauty ba sunan ki Beauty ba”
Duk suka kalli wacce ake maganar a kanta suna dariya
“idan za ki je asibitin yanzu, ki shirya kafin in kai yaran nan school in dawo”
“To” na amsa. Haka suka fice gwanin sha’awa, ni kuma na shiga ciki don yin wanka, duk da ba ni da kayan canjawa.
