Safiyar Monday 8am Bashir ya tashi daga bacci, abun da ya ba ni mamaki sosai musamman lokacin da na zo na same shirye tsab cikin manyan kaya.
Cike da mamaki na kalle shi, kamar zan yi magana sai kuma na fasa na ce “Dama zan kai Assidiq rigakafi ne?”
Hankalinshi a kan laptop din gabanshi ya ce “Break dina fa?”
“a kawo ma nan ne ko, a bar shi a dinning din?”
“Bar shi a can”
“Ok” na fada hade da juya da zummar fita
“Khadija!” ya kira sunana
Wannan ya sa na juyo duk da ban amsa ba
“Zan fara zuwa aiki yau”
“Ma Sha Allah! Wannan ai labari ne mai dadin ji. Allah Ya sa aje lafiya a kuma dawo lafiya, Ya kara ba ka lafiya”
“Amin Ya Rabbb, na gode sosai”
Komai ban ce ba, na kuma juyawa da zummar fita ya ce “Zo nan mana”
Ba musu na dawo baya, hade da tsayawa ina kallon shi.
Hannuna ya janyo har ya zaunar da ni kusa da shi kafin ya ce “Sarkin fushi. Menene kuma yanzu”
Na danne yadda nake ji na ce “babu komai, ba fushi nake yi ba”
“Na ji” ya fada lokaci daya kuma yana plying wani video. Na ranar sunan Ramla ne, Maman Khalil sanye cikin lace purple, ta yi mugun kyau, sosai sai murmushi take yi, hannunta rungume da Ramla, ya jima yana kallon videon kafin ya danna pause hade da sauke ajiyar zuciya ya ce “idan na tafi ina sai ranar Alhamis ko Friday”
Duk da na ji ba dadi amma ban nuna ba, na ce “Allah Ya kai mu”
“Amin.”ya amsa
Jin bai kara cewa komai ya sanya ni mikewa” Ki duba kitchen din, idan akwai abin da kuke bukata let me know “
” Ok”na amsa shi. Kai tsaye kuma na fita zuwa kitchen din, zuciyata na min babu dadi, saboda na san ba yau ne aka shirya komawarshi aikin ba, yau dai din ne ni na sani.
Na dawo mishi da abubuwan da muke bukata a rubuce, bayan ya gama dubawa ya ce “Shi kenan Sagir zai kawo miki”
“To mun gode”
Daki na koma hade da karasa shirina na zuwa asibiti, na saba Assidiq sama kafadata, ina rufe kofar bedroom na ji fitowarshi.
Wannan ya sa muka hadu a falo, hannunshi rike da karamar jaka. Yadda yake shagida kafar sai na ga kamar jakar ta yi mishi nauyi, shi ya sa na mika hannu na karba ina fadin “Har ka yi break din”
“Kunun kawai na sha. Ya isa haka”
Tare muka jera har zuwa wurin da aka wanke mishi motarshi tas, ta fito kamar sabuwa,.
“Shiga sai in ajiye ki a asibitin”
A, hanya muke taba hira, a nan ne ma yake shaida min ya nemi transfer zuwa Katsina. Na yi mishi fatan alkairi.
A kofar asibitin ya ajiye ni, ya juya ya wuce, ban wani jima sosai ba, aka yi wa Assidiq allurar na taho gida
Kai tsaye kuma na wuce family house din su Bashir.
Sashen Murja na fara shiga, saboda muna ɗasawa da ita.
Da Maama na fara cin karo, ta rugo da gudu hade da makale ni tana fadin “Oyoyo Auntynmu” haka take kirana ita ma.
Na ɗan daga ta sama, kasancewar akwai Assidiq a bayana sai na dire ta, lokaci daya kuma muka shiga dakin Murja.
Kwance take saman kujera 3sitter da waya a hannunta
Cikin tabe baki na ce “ana sana’ar ne”
Murmushi ta yi hade da mikewa zaune tana fadin “Ki bari kawai, wani novel na samu mai shege zaƙi”
“Haka dai, daga Monday har sati” na ba ta amsa ina zama kusa da ita
“Daga ina kike?”
“Asibiti, Assidiq na kai allura”
“Ki ce yau akwai kuka”
“Ki bari fa, ga shi Babansu ba ya nan, bare ya taya ni rarrashi.”
“Har ya fara zuwa aikin ne?”
Kai na daga a hankali, kafin na ce “gulma na zo mu yi”
Cikin dariya ta ce “Ina jin ki”
“Don Allah wai wacece Saratun nan ne? Na ga ranar can kuna ta raina min hankali. Amma yanzu na fahimci akwai wani abu tsakaninta da Abban yaran nan”
“To ba dai ruwanki, na ki ido” ta yi min maganar da alamun kashedi
“Dama ni ina ruwana, ni fa so nake kawai ki fada min wacece ita”
“Auho! Bazawara ce, mijinta ya rasu bai dai yi shekara da mutuwa ba”
Cike da mamaki nake kallon Murja, mijin nata bai yi shekara da mutuwa ba, amma har ta fara barbarar wani. Kodayake Ai duk ɗaya ita Abbansu Khalil din.
Mun jima muna hira, kafin na shiga part din Inna.
“Tun dazu Maama ta fada min kin shigo, kuma sai na ji ki shiru” cewar Inna bayan ta amsa sallamata
Assidiq na sauke, a lokacin da nake kokarin zama saman kujera sannan na ce “Na shiga Sashen Maman Abida ne”
“Shi ya sa”
Cike da girmamawa na gaishe ta, sannan mu ka shiga labarin duniya.
Da kaina na shiga kitchen na girka mana abinci, har da wanda zan diba zuwa gida
Assidiq kam sai karfe daya allura ta fara tabashi, inda Allah Ya taimake ni na gama abinci, kuma gida da yawa wannan ya dauka wannan ya dauka, Sai 4pm aka samu ya yi bacci. Ni ma na samu damar yin sallahr la’asar.
Muryar da na ji tana rangaɗa sallama ba karamin kayar min da gaba ta yi ba. Na yi tsum ina tambayar kaina, me ya kawo ta gidan kuma, tun yaushe take zuwa?
Juyowa na yi sosai, wannan ya ba kwayoyin idanmu damar haduwa, yau kuma sanye take da riga da zane na atamfa, ta saka madaidaicin hijab.
Kasa ta tsugunna, suka shiga gaisawa da Inna wacce take goye da Assidiq.
Kafin daga bisani ni ma ta miƙo min gaisuwar na amsa ba yabo ba fallasa.
Sannan ta shiga kiran Maama wacce ke zaune saman kujera ta na cin abinci, amma mirsisi ta ƙi zuwa ko ta amsa ta. Kamar ma ba da ita take ba.
Omo da subalai ta ajiye Inna, sannan ta mike tana fadin “Dama zuwa na yi in gaishe ku”
“To an gode Allah Ya saka da alkairi, ki gaishe da Innar taku”
Ta amsa da to hade da ficewa daga dakin zuwa tsakar gida.
Idanuna na janye daga kanta hade da sauke nannauyar ajiyar zuciya. A raina na ce “Iska na wahalar da mai kayan kara”
Saboda a jikina nake jin Bashir ya wuce da ajin Sarai, irin yaran nan ne girman talla, da alama ba ta yi karatu mai tsawo ba.
“Ki tashi kar yaran nan su dawo kina nan” Inna ta katse min tunanina
Na mike daga zaunen da nake, kafin in yi magana ta kuma cewa “Ki bar Assidiq din a nan, idan ya tashi a kawo miki shi, tun da an samu ya yi bacci”
Sosai na ji dadin maganar, saboda dama Ina ta jimamin yadda za mu kaya idan an tashe shi
Maama kuma ta kafe sai ta bi ni, na fito hannunta cikin nawa, daya hannun kuma rike da foodflask.
A tsakar gidan na hadu da Murja, ta ce “Wai har za ki tafi, na dauka na za a kawo su Affan din”
“Ai ban fadawa mai mashin din su ya kawo su nan ba.”
“Sai ki ga mutuniyar ki”
Wani abu ya daki kirjina kafin na ce “Dama tana zuwa ne?”
“Wannan shi ne zuwanta na uku ina jin dai”
Gabana ya kuma faduwa tsoro ya kama ni, amma ban nuna a fuska ba na ce “Hu’umm”
“Sosai son yayanmu take yi, idan da alkairi Allah Ya tabbatar”
Sai na kasa cewa amin, Sai yake da na yi hade da nufar kofa ina fadin “Idan kin samu lokaci ki zo ki sanya min salataf zan yi kunshi”
“To” ta amsa min, kafin in yi magana kuma kiran Abbansu Khalil ya shigo wannan ya sa na daga
Bayan ya amsa sallama ta ya ce “Har yanzu kina fushin ne, na ji ba ki kira ni ba, ko irin ya hanyar nan”
“Kai din ma ai ba ka kira ba”
“Ni aiki ne ya min yawa, kin san sabon wuri”
“Ni kuma Assidiq ne ya rufa ni da kuka”
“Amma ya yi shiru ai”
“to ga shi nan dai bacci yake yi. Yanzu na hadu da bazawararka” duk yadda na so in rike abun na kasa
“Wacece?” ya tambaye ni
“Kenan suna da yawa?” ni ma na tambaye shi cike da kishi
Dariya ya yi mai sauti kafin ya ce “Khadija tawa”
Kiran na yanke cike da jin zafi, wai haka mutum yake ji idan ya ga mijinshi na neman wata. Kqi akwai zafi gaskiya. Ji nake komai babu dadi.
A haka na karasa gida. Maama na fara yi ma wanka, na canja mata kaya zuwa doguwar rigar atamfa dinkin yara mai kyau. Sosai ta yi kyau, musamman kitson kanta ya kara fito da ita, yadda take ta tsalle-tsallenta sai ta koma min Ramla. Na yi ta kallonta zuciyata na kara min babu dadi
Misalin karfe shidda su Khalil suka dawo, su ma wankan na sanya suka yi, hade da canja kaya sannan suka wuce masallaci, daidai lokacin kuma aka shigo min da Assidiq ya sha kukanshi ya yi gwaɓe-gwaɓe.
Dole na yi zaman ba shi nono, sannan na lallabashi na kwantar na yi sallahr magriba.
Sallahr isha’i kam sai da su Khalil suka dawo masallaci, suka rike min shi sannan na samu na yi ta.
Haka muka rika karba-karba har 10pm Sannan ya yi bacci, su ma suka kwanta. Ramla kam dama tuni ta yi bacci.
Sai da na gama shirin kwanciyata tsab, sannan na kira Bashir
“Ba ki yi bacci ba?” abin da ya fara tambaya ta kenan
“Kewarka ta hana ni” na ba shi amsa
“Kuma da ina nan kin iya saka Assidiq a tsakiyarmu ai”
Dariya mai dan sauti na yi kafin na ce tsoro nake ji.
“Shi ya sa na yi nesa da ke ai, saboda ba zan iya hak’uri ba, kuma na ce ki yi planning kin ƙi yi”
“Zan yi”
“Ya kamata, don ba zan iya ba, in fada miki gaskiya.”
Na kuma yin murmushi kafin na ce “na ga bazawararka yau” haka kawai na ji na kasa rike maganar
“Wacce?” ya tambaya
“Kenan suna da yawa?” ni ma na jefa mishi tambaya.
Dariya ya yi mai sauti kafin ya ce “Khadija tawa”
Na haɗiye wani abu mai daci sannan na ce “Don Allah ina son zuwa gida, a wannan karon dai ka duba min don Allah.” na karashe maganar kamar zan yi kuka.
Saboda rabona da in je gidan tun kafin su yi accident, sama da shekara daya kenan, saboda ko yanzu Khalil watanshi hudu.
“Zan duba, kin san ba na son a bar yaran nan”
Shiru na yi komai ban ce ba, saboda kullum abin da yake fada kenan, bai so a bar yara. Yaran da gasu nan a tsakiyar dangi. Kila ni na daina zuwa unguwa saboda su.
“Na gode” na amsa hade da sauke ajiyar zuciya
“Take care!”
“Thank you!” na fada hade da lumshe idanuna, saboda yadda ya yi maganar
Ajiye wayar na yi batun Sarai na dawo min cikin kai, ban san haka mata ke ji ba, idan alamu suka nuna mijinsu na shinshinar wata mace, ko ita macen na shinshinarshi.
Abu kamar wasa sai na kasa bacci, har 12am,idanuna biyu, comparing kaina da Sarai kawai nake yi, ta ko wane fanni na yi mata fintinkau, amma lamarinta ya dame ni, kodayake an ce kishiya ba ta da kadan.
Bacci ba shirin daukata Assidiq ya farka, don haka muka dosa har 2am,sannan na samu ya yi bacci, ni ma na samu baccin ya dauke ni.
Safe kuma na dora hidimar gida, daga wannan sai wannan babu wani hutu.
Wannan abu sosai yake damuna.
Ranar Alhamis da yamma sai ga Bashir kwatsam, saboda bai fada min zai zo ba.
Inda Allah Ya taimake ni, komai nawa tsab, amma yana zuwa da batun Maama ya fara ko zama bai yi ba “Har yanzu ba ki mayar da Maama ba?” ya yi tambayar da alamun bacin rai.
Na danne nawa bacin ran na ce “Ita da kanta ta zo”
Wani kallo ya yi min kafin ya ce “Tun daga can gidan take zuwa nan ita kadai”
“To zan yi karya ne, ka gwada tasa ta gaba ka sha mamaki”
“Na san halin ki ai, za ki iya zuwa ki dakko ta”
Baki kawai na rabe,idan na ce zan mayar mara dadi ce, wai ya san hali na, irin na saba dakkotan nan.
Assidiq ya amsa da yake ta kallon shi ya ce “My boy, ka girma fa”
Shi ko ya wangale mishi baki
“Ina sauran yaran?” na dauka ma tambayar da zai fara kin kenan, Sai ya fara da batun Maama.
“Suna cikin gida” na ba shi amsa lokaci daya ina zare mishi takalman kafarshi da socks din.
“Ya gidan?”
“Yana nan lafiya sai kewarka”
Murmushi ya yi kafin ya ce “Kamar gaske”
Ni ma murmushin na yi ina fadin” gaske ne mana”
Ruwan wanka na hada mishi, bayan ya fito ya yi shirin masallaci saboda ana ta kiran sallah. Ni kuma na shiga gyara tsarabar da ya zo da ita, na kuma ware wacce za a kai cikin gida
Misalin 8:30pm ya shigo tare da yaran a zuciyata na ce “Sai da ka lalubo su kenan”
Abinci na hada musu, suna ci suna hira, ban samu kanshi ba, Sai da suka yi bacci sannan.
Muna kwance bayan ya gama sauke nauyin da yake ta cewa ya zo da shi ya ce “An gama komai na gida fa sai tarewa”
“Kai Ma Sha Allah, yaushe kenan tarewar?”
“Shi ne har yanzu nake ta tunani, ba na son a kara cire yaran nan daga makarantar nan zuwa wata, abun sai ya yi yawa. Tun da saura term daya su gama na ce ko mu jira su kawai, kin ga muna komawa js1 za su tafi.”
