Tunda su Deeni suka bar Nigeria Hajiyarsu da ƴan’uwansa hankalinsu bai kwanta ba, kullum cikin fargarbar zai warke, ko ba zai warke ba, tunda dama ɗayan biyu ne, ko a yi nasara, ko kuma akasinta, shi ya sa kullum cikin yi masa addu’a suke ta hanyar yin sadakoki da kuma salloli, domin samun lafiyar Deeni tamkar samun lafiyar zukatansu ne, haka gazawar lafiyarsa daidai take da gazawar su, kasantuwarsa na tamkar Uba, kuma bango abin jingina a gare su.
A yau kuwa da ya kasance ranar da za a yi masa aiki ne Hajiyarsu ta ƙara ƙaimi a wurin addu’a. Tun da ta yi sallar asuba take ta Istighfari da Salatin Annabi Sallallahu alaihi Wasallama, domin mabuɗai ne shigewar addu’a da kuma karɓuwarta. Lokacin sallar walha kuwa tana kai goshinta cikin sujuda ta cigaba da jero addu’oi kamar haka “Ya Allah ga bawanka can za a yi masa aiki, ina roƙon ka domin girman Zatinka da buwayarka ka warkar da shi.” Sosai ta kai maƙura a wurin yi masa addu’a, bayan ta gama ne ta cigaba da jan carbi, wanda sallamar Hajiya Ummah ce ta dakatar da ita.
Aikuwa ta ji daɗin zuwanta, saboda gidan ya yi shiru, kasantuwar Gwaggo Salame ta fita kasuwa, gefenta Hajiya Ummah ta zauna akan carpet tare da bata gaisuwa, amsawa ta yi da “Ya gidan”, Hajiya Ummah ta ce “Lafiya lau suke, duk suna makaranta, sai Salim kaɗai.”
“Masha Allah” ta faɗa, tare ɗan yin shiru tana nazarin halin Salim da ya fita zakka a cikin jikokinta, sam shi baya son karatu, da ƙyar aka samu ya gama secondary school, sannan ga masifar shaye-shaye da ta sauya mashi kamannu, duk wanda ya gan shi ba zai taɓa cewa shi ɗan gata ne ba. Kuma duk abin da ake zaton na tarbiyya ne dai-dai gwargwado Hajiya Ummah tsaye take, amma da yake abin jarabawa ce, ga shi nan sai fama take da shi.
Cikin rashin walwalar zuci ta tambayi Hajiya Umma “Shi Salim yanzu da sauƙi rashin jin ko?”, ran Hajiya Ummah itama ba daɗi ta ce “Da sauƙi dai Hajjah, kawai dai Allah ya shirya mana su”, Hajjah ta ce “Amiiiiin ya Allah.”
Maganar Salim bata cika yi musu daɗi ba, shi ya sa basa bari ta yi nisa ba, batun Deeni kuma suka ɗauko Hajiya Ummah ta ce “Ko ya ake ciki yanzu?”, Hajjah ta ce “Bamu daɗe da waya da Farouk ba, ya ce “Tun ɗazu aka shiga da shi”, Hajiya Ummah ta ce “Allah ya sa a dace”, Hajjah ta ce “Amiiiin ya Allah.”
Suna nan zaune sai ga Yaya Asiya da Aunty Salma sun zo, dukkansu a ƙasa suma suka zauna kan carpet, bayan sun gaisa ne Yaya Asiya ta ce “Wai ina Gwaggo Salame?”, Hajjah ta ce “Ta fita kasuwa”, Aunty Salma ta ce “Kasuwa kuma, ita ina ta sani a garin nan?”, Hajiya Ummah ta ce “Ke dai bari, kada tsohuwar mutane ta ɓace a garin nan mu shiga uku.”
Yaya Asiya ce ta kawo musu hanzarin gidan ba kowa, dole sai ita ɗin ce zata je. Shawara ta kawo a kan dole a samu masu aiki a gidan, idan ya so ita Gwaggo Salame sai ta riƙa kula da Hajjah.
Deena kuwa ta rasa me ke mata daɗi a ranta, domin ta yi nazarin maganar da Deeni ya faɗa mata na cewa ta ba shi kunya, ta kuma fahimci sam bata kyauta ba, duba da yadda yake bata cikakkiyar kulawa, da kuma kauce ma ɓacin ranta duk da basa tare, kuma har ila yau ta ƙara fahimtar tsokana ce yake yi mata, mafarin tunda safe ta yi mashi magana.
Sai dai Kwata-kwata basu ma zo online ɗin ba, bare su duba me ta ce. Ta duba WhatsApp kuwa ya fi a ƙirga, sai wurin ƙarfe sha biyu ne ta ga Tick biyu, alamun saƙon ya shiga, ƙuri ta yi ma waya, tana tsammanin ganin reply, amma ba alama.
“Uncle Lalu barka da rana, don Allah har an shiga aikin da Yaya?”, tambayar da ta rubuta kenan, wani abun da ya sanya mata fargaba shi ne, ga Lalu ɗin online, amma bai buɗe ba, bare ya bata answer, bata yi zuciya ba ta kira voice call, shi ma shiru ya ƙi ɗagawa.
Sosai kuwa abin ya dame ta a rai har ta kai ga ta nemi yunwar da take ji ta rasa, idanunta cike da ƙwalla ta ce “Duk ja mani aka yi, yanzu da ina tare da mijina waye zai ja mani aji bare har raina ya ɓaci.”
Jiki ba ƙwari ta sauko daga kan gadon, don muddin tana zaune, toh zata iya haɗiye zuciya ta mutu, ban ɗaki ta shiga, tana wanka tana kuka, tana gamawa ta fito ta kimtsa, Raihan dama yana can wurin masu aikin gidan.
Downstairs ta sauka, in da ta iske Ummanta da Alhaji Lawan suna hira, gefen da Alhaji Lawan yake ta zauna a ƙasa, cike da girmamawa ta ce “Daddy barka da rana.”
Tunda ta fito daga ɗakin ya lura da sanyin jikinta, kuma ko ba a faɗa mashi ba ya san tatsuniyar gizo bata wuce ƙoƙi, kewar mijinta ce ta motsa mata, don haka yaukar ma ransa ya yi kafin ta bar wurin sai ya sanya ta farincikin da sai ya zama silar yayewar baƙinciknta.
Sai da ya dube ta da kulawa sannan ya amsa da “Barka dai Madinatu, ina abokina yake?”, ta ce “Yana wurinsu Iya”, ɗan jinjina kai ya yi “Okay, toh Allah ya yi maku albarka”, ta ce “Amiiiiin Daddy.”
Duban mahaifiyarta ta yi “Barka da rana Mommah”, cike da izza irin ta uwa mai ji da kanta ta ce “Barka dai, kin tashi lfy”, ta ce “Lafiya lau Alhamdulillah”, ta ce “Masha Allah.”
Itama Ummanta maganar makaranta ce cike da ranta, domin a ganin ta ya kamata Deena ta koma hakanan, ta yunƙura zata yi mata magana kenan Alhaji Lawan ya tari numfashinta lokacin da ya ce “Madinatu”, amsawa Deena ta yi “Na’am Daddy”, ya ce “Yaushe rabon ki da ziyartar Madina?”
Wannan tambaya tamkar wifer haka ta fara goge ƙunar ran da ke mamaye da zuciyar Deena, don tana da yaƙinin maganar faɗa da cikawa ce za a yi. Fuskarta cike da walwala ta ce “An daɗe Daddy”, ya ce “Ai na san an daɗe ɗin, lokacin nake son ki tuna, sai in ga me kamata a yi.”
Wannan kara da karamcin na daga cikin dalilan da suka sa Umman Deena take ƙaunar Alhaji Lawan, domin duk abin da yake yi ma ƴaƴansa ba wanda bai yi ma Deena, shi ya sa ba ƙaramar nadama ta yi ba lokacin da ta nuna mashi bai isa ba a kan al’amarin auren Deena.
Ita ta ba shi amsa da “Rabon ta Umara ma ai tun kafin ta yi aure fa”, idanu ya ɗan zaro”Lallai an daɗe, toh ki shirya, may be next week Insha Allahu zamu wuce, saboda yanzu akwai visa available.”
Wani irin daɗi da ya taso ma Deena bata san lokacin da ta dafa mashi ƙafafu tana murna ba, “Daddy na gode, Allah ya saka da Alkhairi, Allah ya jiƙan magabata.”
Alhaji Lawan bai cika son nacin godiya ba, amma duk lokacin da aka yi ma mahaifansa addu’a, toh cike da jin daɗi da kuma alfaharin ya zama silar nema ma mahaifansa rahama yake cewa “Amiiiiin, Nagode.”
Umman Deena ma godiya ta yi mashi a nan, suna komawa ɗaki kuwa ta rungume shi ta baya, tare da kwantar da kanta a gadon bayansa ta yi shiru.
Ya san irin wannan salon godiyar, ɗora hannunsa ya yi a kan nata ya ce “Menene?”, sumbatar bayansa ta yi kafin ta ce “Godiya ce mijina”, girgiza kai ya yi “Mention note”, tare da zagayo da ita suna fuskantar juna. Alhaji Lawan yana masifar son Umman Deena, duk da idan ta botsare mashi sai ya sha wahala kafin ya shawo kanta, ƙuri na few seconds suka yi ma juna tamkar wasu sababbin aure, “Bana son godiya komai Hadizatu”, ya faɗa bayan ya sumbaci lips ɗinta.
Ƙarasa kashe ta ya yi da ƙauna saboda tana ƙaunar sunan “Hadizatu”, da ya faɗa, sai da ta buɗe idanunta da ke lumshe sannan ta ce “Godiya dole mijina, ina ƙaunarka fiye da yadda kake zato, na yi alƙawarin dauwamar da kai a cikin farinciki har karshen rayuwata Insha Allahu”, tamkar zai maida ta ciki ya ce “Ni ma Hadizatuna.”
Daga nan dai ƙauna ta cigaba da progressing, tuni dama sun garƙame ɗaki ta yadda ko marubuciya bata san me ya cigaba da wakana ba.
Deena kuwa tana shigewa ɗaki ta zube ƙasa tana sujudu Shukkur, domin duk wanda yake cikin damuwa, kuma aka yi masa albishir da zuwa wurin mai Magaryar Tiƙewa, toh tamkar an masa albishir ɗin yaye damuwarsa ne.
“Allah Nagode maka da ka kawo ƙarshen damuwata, ina roƙon ka ka sa iyakar ƙuncina ne ya zo”, abin da ta yi ta addu’a kenan, bayan ta gama ne ta ɗauki waya ta shiga WhatsApp, reply ɗin Lalu ne a sama, da sauri ta buɗe tare da playing voice ɗin, “Barka dai Deedee, Yaya yanzu haka yana thiyater room, muna sa ran ma an kusa fitowa da shi, sai mu yi masa fatan Allah ya sa a dace.”
A hankali Deena ta lumshe idanu, a fili ta ce “Ya Allah, ka sa wannan aikin ya zama silar samun lafiyar mijina Amiiiiin”, a take kuma zuciya ta ja ta cikin wani tunanin, har ta jefa ma kanta tambaya “Toh yanzu idan Yaya ya warke Mommah zata bari na koma gidansa.?”
Bata da wannan amsa, domin ta fi kowa sanin wacece mahaifiyarta, baki ta ɗan taɓe lokacin da ta tuna Umara fa zata je, a can ne kuma zata nemi agajin Ubangiji a kan ya taimaketa ta dasa sabuwar rayuwa da mijinta.
Reply ta yi ma Lalu mai ɗauke da doguwar addu’a, sannan ta rufe data ta fito wurin ɗanta, don idan ba nemansa ta yi ba, masu aikin can basu cika kawo mata shi ba.
A thiyater room kuwa tuni Dr. Niranjana da sauran Doctos suka tsayu a kan aikinsu wurin ganin sun ceci rayuwar Deeni, ku san ma basu taɓa yin aikin da suka saudaukar da kwarewar da Allah ya basu ba sai a kan Deeni, duk da ba a taɓa samun matsala a aikinsu ba, toh amma dai wannan na daban ne a wurinsu.
Deeni kuwa ba zai iya tantance me ke faruwa ba a zahiri, sai dai a can cikin zuciyarsa yake jin komai, addu’ar Allah ya sa a dace yake, domin hakan ne zai ba shi damar sake yaƙi wurin ganin matarsa da ɗansa sun dawo a cikin rayuwarsa, yana ta wannan tunanin ne har aka gama thiyater bai sani ba, sai can kamar a cikin barci ya ji an dafa shi ‘Nuraddeen”, firgitgit ya farka tare da amsawa “Yes”
Ƙuri Dr. Niranjana ta yi ma fuskarsa mai annuri, duk da idanunsa ɗaure suke da bandage, amma hakan bai hana kyawu da kwarjininsa fitowa fili ba, a ranta take ruwaita da a ce addininsu ɗaya, kuma Deeni zai iya zaman India, toh da ta aje ƙabilanci a gefe ta aura mishi ƴarta mai suna Shwiter, kai ba ƴarta ba, ko ita kanta da girmanta idan ta samu Deeni auren sa zata yi.
“We did our best, and the God will finish the rest”, abinda Dr. Niranjana ta faɗa mashi kenan. Jinjina kai sauran Doctors ɗin suka yi, lokaci ɗaya kuma suna faɗin “May God heal you.”
Tamkar dutse haka Deeni ke jin kansa da nauyi, mafarin sai dai ya ɗan buɗe baki kafin ya ce “Amiiiiin, thank you so much.”
Su Asma’u suna zaune sun yi jugum ne suka ga su Dr. Niranjana sun fito, da sauri suka miƙe, tarbarsu suka yi suna yi musu ban gajiya tare da neman iznin shiga a wurin Deeni. Sun samu damar shiga, amma da sharaɗin kada su yi hayaniya.
Ƙuri suka yi masa, zukatansu cike da tausayinsa, shi kuwa bai ma san sun shigo ba, saboda baccin da ya ɗauke sa.
Zamansu kenan wayar Lalu ta fara ruri, da sauri ya ɗaga da sallama saboda Number Yaya, muryar Hajiyarsu ya ji tana faɗin “Farouk, ya asibitin”, murya ƙasa-ƙasa ya ce “Alhamdulillah, yanzu aka gama yi masa aikin”, ta ce “Masha Allah, kuna ganin alamun sauƙi ko?”, cike da yaƙini ya ce “Eh Hajjah, Insha Allahu an dace ma.”, ta ce “Toh Alhamdulillah, Allah ya bashi lafiya.”
Asma’u ce ta karɓi wayar, bayan sun gaisa ne”Hajjah ta ce “Kina dai yi ma Yayanki addu’a ko?”, Asma’u ta ce “Ina yi Hajja”, daga can ta ce “Toh Allah ya yi maku albarka”, Asma’u ta ce”Amiiiiin Hajjah.”, Bashir ma karɓar wayar ya yi suka gaisa, godiya sosai Hajjah ta yi mashi, saboda shi ne jagaban tafiyarsu, duk wani shige da ficen da ake a asibitin da Indiyar ma shi ne ba tare da gajiyawa ba. Shi kuwa Bashir duk sai ya ji nauyin godiyar, saboda dolensa ne ya taimaka m
usu, ko da bai auri Asma’u ba, bare kuma da yanzu yake family member.
