Cikin wani irin salo take saukowa daga kan bene, ƙarar sarƙar ƙafarta da ƙarar takalmanta masu tsini sun cika Parlourn duk sun baza idanuwa su ga da wane sabon salo ta shigo, Sai da ta sauko ƙasa sannan ta cire gilashinta ta fara ƙare musu kallo ɗaya bayan ɗaya.

Kyakkyawa ce sosai, ita ba fara ba ita ba baƙa ba, amma kalar fatarta da ka gani ka san hutu ya zauna mata, tana da 'yar ƙiba kaɗan, ɗinkin Lace ne doguwar riga a jikinta baƙi da golden sai stones da suka ƙawata ɗinkin suna ta walainiya. . .